ILOILO CITY – Sa tuig 2025 pa mahatagan sang direkta nga solusyon ang kakulang sang byahe sang eroplano nagikan sa Manila padulong sa Iloilo.
Sa interview sang Bombo Radyo kay Iloilo City Mayor Jerry Treñas, iya ginpahayag nga ginprangka siya sang mga airline companies nga indi pa sila maka dugang sang flights bangud sa kakulang sang eroplano sa tagsa ka kompaniya.
Suno kay Mayor Treñas, indi lang ang Pilipinas ang naga-order sang dugang nga mga aircraft kundi pati man iban nga pungsod.
Dugang pa sang alkalde, ang isa man sa problema amo ang congestion sa runway sa Manila.
Bangud nga indi pa madugangan ang flights sa Iloilo, nagpanugyan ang mga airline companies nga mag-book lang anay sang ticket halin sa Manila padulong sa iban nga bahin sang Western Visayas kag mag-sea ukon land travel padulong sa syudad.
Ini ang ginalantaw nga temporaryo lamang nga solusyon ilabi pa nga madamo ang mga events nga gina-cater sang syudad kag probinsya sang Iloilo.
Gindayaw naman sang mga airline companies ang Iloilo bangud nga isa ini sa mga paborito kag popular nga destinasyon sang mga turista.
