ILOILO CITY – Ginpabugal sang Iloilo Police Provincial Office ang operational accomplishments ni Police Colonel Ronaldo Palomo sa iya “First 100 Days” nga pagpungko bilang director.
Si Palomo ang nagpungko bilang directoe sang nagligad nga Marso 4 subong nga tuig.
Humalin Marso 4 tubtob Hunyo 13, sunod-sunod ang nangin operasyon sang kapulisan batuk sa mga wanted persons, ilegal nga droga, loose firearms, ilegal nga sugal, illegal fishing, kag iban pa.
Sa data sang Iloilo Police Provincial Office, nagdangat sa 347 ka mga illegal fishers ang nadakpan sang kapulisan nga mas mataas kun ikumpara sa 33 sa amo man nga period sang nagligad nga tuig.
Sa kampanya kontra sa iligal nga droga, nagdangat sa 1.123 kg ang nakumpiskar sang kapulisan nga may standard drug price nga masobra sa P7.6 million sa 81 tanan nga operasyon nga nagresulta sa pagkadakop sang 101 nga mga drug personalities.
Natigayon naman nga madakpan ang 135 ka mga most wanted persons kag 495 other wanted persons.
Sa kampanya naman batuk sa loose firearms, nagdangat sa 183 ka mga indi lisensyado nga armas ang ginsungka sa kapulisan kag dugang nga 63 nga may expired nga lisensya kag may yara sang 49 ka mga indibidwal nga nagkaladakpan.
Samtang, sa 65 ka mga operasyon nga ginpatigayon sa kampanya kontra ilegal nga sugal, 156 ang naaresto sang kapulisan kun sa diin, 56 na ang napasakaan sang kaso.
Sa interview sang Bombo Radyo kay Police Major Rolando Araño, spokesperson sang Iloilo Police Provincial Office, iya ginpahayag nga tuman ka dako sang ginsaka sang operational accomplishments humalin sang nagpungko si Palomo bilang director.
Dugang pa niya, ini ang nagapakita lamang nga mataas ang pagsalig sang pumuluyo sa kapulisan.
Suno pa kay Araño, manami man ang contribution sang mga police units sa idalom sang Iloilo Police Provincial Office.
Nagpasalamat man ang natungdan sa maayo nga pagtamdanay sang kapulisan kag mga stakeholders ilabi na sa media nga nagabulig edukar sa mga pumuluyo.
