Bangud graduation season sa gihapon subong, sunod-sunod ang mga istorya nga makapukaw sang aton nga balatyagon kag maka-agaw gid sang aton nga atensyon.
Isa diri ang istorya sang conjoined twins sa Statesville, North Carolina, USA nga ginhatagan lang anay sang duha ka porsyento nga tyansa nga mabuhi, apang subong pareho na nga healthy kag naka-graduate sa Kindergarten!
Ini ang istorya sang kapid nga sanday Abby kag Erin nga ginbun-ag nga tapikanay ang ulo ukon ginatawag nga craniopagus twins, isa ka kondisyon nga nagatapik ang ila nga bagul kag isa lang ang iban sa ila nga brain tissues. Sa pagkamatuod, isa sa 2.5 million lamang ang tyansa nga makaangkon sang craniopagus twins rason nga espesyal ang kaso nanday Abby kag Erin.
Suno sa ila 33-anyos nga mommy nga si Heather Delaney, nagabusong pa lamang siya sang ginpahibalo sang doktor nga gamay lang ang tyansa nga mabuhi ang iya mga bata.
Hulyo 2016 sang ginbun-ag ang kapid, apang bangud sa kondisyon, wala anay sila ginpa-guwa sa neonatal intensive care unit sa Children’s Hospital of Philadelphia sa Pennsylvania. Sang 2017, ginpaidalom sila sa 11 ka oras nga operasyon agud nga maseparar ang ila nga mga ulo.
Sang amo nga tion, malaka pa gid lamang ang naga-risgo sa kaangay nga operasyon rason nga tuman ang kahadlok sang pamilya, apang, tuman ang kalipay sang mommy kag daddy nga pareho nga nakaluwas ang duha ka bata.
Fast forward subong nga tuig, malapit na lang ang ila nga 7th birthday kag proud parents gid sanday Heather kag iya mister nga si Riley samtang ginalantaw ang paggraduate sang duha ka bata sa Kindergarten.
Mangin ang mga doktor ang haluson man makapati kun makita ang kapid, kag ginakabig ini isa ka milestone nga ila nalab-ot.#
