Indi pa masigurado kun personal nga masaksihan sang Filipino basketball fans ang hampang ni Milwaukee Bucks forward Giannis Antetokounmpo sa FIBA World Cup sa Manila sa Agusto.
Duha-duha ang kondisyon sang two-time NBA Most Valuable Player nga makahampang para sa pungsod Greece bangud naga-recover pa lamang ini matapos nga ginpaidalom sa cleanup procedure ang iya wala nga tuhod sang nagligad nga semana.
Matandaan nga nagsuprer si Antetokounmpo sang back injury sa first-round playoff series batok sa Miami Heat, apang indi maathag kun kaangot ang amo nga injury sa iya latest nga pagpa-opera.
Patigayunon ang World Cup sa Pilipinas, Japan, kag Indonesia umpisa sa Agusto 25 tubtub sa Septyembre 10.
Natuon ang Greece sa Group C kaupod sa Estados Unidos sang Amerika, New Zealand, kag Jordan.
Daku nga kadulaan sa Greece pananglitan indi makasulod sa tournament ang nasambit nga basketball star nga top scorer anay sa EuroBasket tournament sang nagligad nga tuig nga may average nga 29.3 points apisar pa nga nalutos ang iya nga team batok sa Czech Republic sa round-of-16.
Kabahin man ang 28-anyos nga ginbansagan Greek Freak sa team sa Greece sang 2019 World Cup apang wala ini nakalusot sa group stage. #
