ILOILO CITY – Natalana na nga ideklarar nga rabies free ang bag-o nga tourism destination sang probinsya sang Iloilo — ang Sicogon Island.
Ang nasambit nga isla sa banwa sang Carles ang yara na sa idalom sang pre-evaluation sang Provincial Rabies Control Committee agud nga opisyal na ini nga madeklarar nga rabies-free sa Septyembre 28, 2023 kadungan sang World Rabies Day.
Ang komitiba ang ginalakipan sang mga personnel halin sa Provincial Veterinary Office kag Provincial Health Office.
Ang Sicogon Island ang ginalakipan sang tatlo ka mga barangay nga amo ang Alipata, Buaya kag San Fernando.
Sa interview sang Bombo Radyo kay Dr. Darel Tabuada, pinuno sang Iloilo Provincial Veterinary Office, iya ginpahayag nga ang pre-evaluation ang nagalantaw sa isa ka area kun nalab-ot na ang criteria nga gin-set sang Regional Technical Working Group.
Lakip sa mga criteria amo nga dapat nga wala na sang kaso sang rabies sa nagligad nga tatlo ka tuig.
Agud nga mangin rabies-free ang Sicogon Island, nagakadapat nga magadangat sa 70 percent sang dog population ang mabakunahan sa nagligad nga duha ka tuig, magadihon sang local ordinance sa prevention kag control sang rabies, may presensya sang effective rabies control committee, may yara sang naga-operate kag bastante nga surveillance system, mag-establish sang mekanismo agud nga masiguro ang availability sang human kag animal anti-rabies vaccines, mag-integrate sang rabies program curriculum sa mga elementary schools kag magselebrar sang Rabies Awareness Month kag World Rabies Day.
Sa tion nga ma-comply na ini, i-forward sang Provincial Rabies Control Committee ang mga dokumento sa Regional Technical Working Group para sa double checking.
Sa tion nga mapasar na, ginpahayag ni Tabuada nga ang Sicogon Island ang mahimo na nga madeklarar nga rabies-free sa Septyembre 28.
Bangud sini, ang tatlo ka mga barangays sa Sicogon ang makabaton sang P50,000 cash incentive kag dugang nga P50,000 agud mabuligan sila sa pagsustenir sang rabies-free status.
Sa bahin sang provincial government, ginpahayag ni Tabuada nga maga-award sila sang certificate of recognition sa tatlo ka mga barangay.
Samtang, ang kaiping nga island barangay sang Sigocon nga amo ang Isla De Cana ang natalana man nga ipaidalom sa pre-evaluation.
Sa subong, lima ka mga island barangays kag duha ka mga isla sa Iloilo ang rabies-free.
Nagdangat naman sa P8 million ang ginpa-in nga pondo sang probinsya para sa pagbakal sang 20,150 vials sang bakuna nga ipanagtag sa 42 ka mga banwa kag sa syudad sang Passi subong nga tuig.
