ILOILO CITY – Nagpasaka sang kaso ang pamilya sang isa sa mga napatay sa Baldoza incident batuk sa duha ka mga rescuers.
Ang ginpasakaan sang kaso amo ang chief sang Urban Search and Rescue nga si Daryl Darwin Thulasidas nga amo ang nagmaneho sang tanker truck.
Ginpasakaan man sang kaso si Ildefonso Herrera nga amo ang nagmaneho sang rescue truck nga nagguyod sa water tanker nga ginmaneho ni Thulasidas.
Sa interview sang Bombo Radyo kay Barangay Kagawad Jerry Dunlao nga nagtindog man nga witness, iya ginpahayag nga kaso nga Reckless Imprudence Resulting to Homicide ang ginpasaka sang amay sang napatay nga si Jay Ann Caburog.
Suno kay Dunlao nga isa ka mekaniko, ginsaysay niya sa affidavit ang paandam niya kay Thulasidas nga i-check gid ang palatyan sang truck antes guyuron bangud may tsansa gid ini nga mag-andar kag mahimo nga makahalit pa sa iban kun indi mangin mahalong.
Apang suno kay Dunlao, wala gid namati sa iya ang rescuers kag natabo gid ang iya ginkabalak-an nga matabo kun sa diin, ginsalakay sang truck ang nagatinumpok nga tawo nga nagresulta sa kamatayon sang duha ka mga biktima kag pagkapilas 17 ka iban pa.
