Gin-umpisahan na sang Philippine women’s football team ang training session sa New Zealand masobra isa ka semana antes ang natalana pagtungtong sang pungsod sa FIFA Women’s World Cup.
Makit-an ang Filipino players sa Olympic Park sa Auckland kun sa diin nahamtang ang base camp sang team tubtub sa katapusan sang group stage.
Suno kay co-captain Hali Long, maayo ang pitch ukon ang football field kag masanag ang butlak sang adlaw sa ila paghanas.
Importante ang siyam ka masunod nga adlaw para sa Filipinas sa ila paglaum nga makahatag man sang solid show batok sa superior teams sa Group A nga amo ang Switzerland, co-host nga New Zealand, kag Norway.
Antes ang Hulyo 21 nga una nga hampang batok sa Switzerland, magasabak anay ang Filipinas sa training match batok sa Sweden sa Hulyo 17 sa Wellington.
Lunes sang nag-abot ang team kag nakabaton sang matunog nga singgit kag suporta halin sa mga nag-welcome mga Pinoy sa Philippine embassy kag halin man sa Filipino community sa amo nga pungsod. #
