ILOILO CITY – Nadula na ang pagsalig sang pila sa mga empleyado sang Iloilo City Hall sa Multi-Purpose Cooperative sang Iloilo City Government.
Sa interview sang Bombo Radyo kay Alyas Jemma, iya ginpahayag nga naubos na gid ang iya nga pagsalig sa dalagan sang kooperatiba matapos nagtuluhaw ang mga issues sa dalagko nga loans sang board of officials.
Suno kay Alyas Jemma, mas nagdamo pa ang nagpasa sang mga papeles para mag-withdraw sang ila share capital.
Ginkumpirma naman ni Mr. Leo Elevencione, Chairman of the Board sang kooperatiba nga naglab-ot na sa masobra 100 na ka mga empleyado ang nagdesisyon nga bawion ang membership sa kooperatiba.
Ginpakigbahin man ni Alyas Jemma ang sitwasyon sang iya kaupod sa opisina nga tatlo na ka bulan nga pending ang withdrawal status sang iya share capital sa kooperatiba apang padayon sa gihapon nga ginakuhaan sang membership fee.
Nagalaum si Alyas Jemma nga ang masunod nga mga opisyales sang kooperatiba ang may nagakaigo nga ihibalo sa insakto nga pagpamalakad sang organisasyon kag may integridad sa pagkapot sang kwarta nga ginsalig sang mga miyembro sa ila.
Dugang pa sang natungdan, ginalantaw niya sa gihapon nga inosente ang mga board of officials sang kooperatiba bangud wala pa napamatud-an nga guilty sila sa ano man nga anomaliya.
Samtang, magapatigayon sang legislative investigation ang Iloilo City Council sa mga board of directors sang kooperatiba sa Lunes nga adlaw.
