ILOILO CITY – Padayon pa nga ginapangita sang mga kapulisan ang isa sa duha ka mga suspect sa pagtiro sa mag-utod sa Barangay Pasayan, Batad, Iloilo.
Ang at-large nga suspect amo si Juliuncy Laña, 37, tumandok sang Barangay San Antonio, Cuartero, Capiz samtang arestado ang iya live-in partner nga si Rose Ann Esteban, 31, residente sang nasambit nga lugar.
Ang mga biktima naman amo ang mag-utod nga sanday Benjie Esteban, 34, kag Noel, 37.
Sa interview sang Bombo Radyo kay Police Captain Jaypee Silvestre, hepe sang Batad Municipal Police Station, iya ginpahayag nga matapos ang pagpaniro, gilayon nga nagdalagan si Laña kag nagpadulong sa nabukid nga bahin sang barangay samtang si Rose Ann ang nagsakay sa motorsiklo apang nadakpan sa hot pursuit operation.
Kun balikan, base sa imbestigasyon sang kapulisan, naga-inom-inom ang mga biktima sang nag-abot ang mag-live-in partner.
Suno kay Silvestre, nagsinyas pa si Rose Ann sang “dirty finger” kay Benjie kag gintawag nga magkadto sa iya.
Nagpati man ang biktima kag sang malapit na ini, ginsugo ni Rose Ann ang iya live-in partner nga si Laña nga tiruhon si Benjie.
Na-igo ini sa iya ulo kag abaga.
Sang nakita naman sang utod nga si Noel ang natabo, nagpalapit man ini apang gintiro man ini sang suspect kag na-igo sa iya abaga.
Nagagwa sa imbestigasyon sang kapulisan nga daan nga hiligut-anon kag away sa duta ang motibo sang krimen.
Nagpanawagan man si Silvestre sa mga nakakita kay Laña nga gilayon nga magpahibalo sa pinakamalapit nga police station.
