Nalutos ang Philippine women’s football team sa kamot sang powerhouse team nga Sweden sa isa ka closed-door friendly match nga ginpatigayon antes ang FIFA Women’s World Cup.
Indi maathag ang iban nga detalye sa hampang apang suno sa Swedish Football Association, si Stina Blackstenius sang English club Arsenal ang nakahimo sang hat trick ukon naka-tatlo ka goals.
Nag-resulta man ang hampang sa 5-1 nga kadalag-an sang Sweden sa match sa Wellington matapos naka-skor man sanday Fridolina Rolfo kag Johanna Rytting Kaneryd.
Wala naman sang ginpaguwa nga detalye ang Philippine Football Federation kun sin-o sa Filipinas ang naka-skor sang consolation goal.
Ang amo nga hampang ang may yara sang tatlo ka 30-minute periods sa baylo sang nakaandan nga duha ka 45-minute periods, base man sa nakasugtan sang duha ka teams.
Suno kay Coach Alen Stajcic, ini nga match amo ang final warmup sang team antes ang pagsaka sa World Cup sa Byernes batok sa Switzerland.
Matapos atubangon ang Switzerland sa Hulyo 21, makasumpong sang Filipinas ang host nga New Zealand sa Hulyo 25 sa Wellington, kag magabyahe balik sa Auckland para sa match batok sa Norway sa Hulyo 30 agud makumpleto ang group stage. #
