ILOILO CITY – May kinamatarong ang tagsa ka tawo nga magpadalagan sa eleksyon kasunod sang impormasyon nga naguwa nga plano sang isa sa mga kabataan sang presidente ang mapadalagan sa 2025 elections sa Iloilo.
Una na nga ginpahayag ni Senator Imee Marcos nga may isa ka anak si Presidente Ferdinand Marcos, Jr. nga nagaplano nga magpadalagan sa Iloilo.
Apang kahapon, ginklaro niya nga langas-langas lamang sang iya pamilya nga magapadalagan sila sa nagkalain-lain nga bahin sang Pilipinas.
Sa interview sang Bombo Radyo kay Iloilo Governor Arthur Defensor Jr., iya ginpahayag nga mahimo gid nga magpadalagan sa ano man nga posisyon ang indibidwal kun kwalipikado man lang ini sa idalom sang layi.
Mahimo lamang nga makaprehistro bilang botante ang indibidwal kun residente ini sang lugar sa sulod sang indi magnubo sang anom ka bulan antes ang election period.
Kun magapapili naman ini sa eleksyon sa barangay level, local level ukon national level, nagakadapat nga indi magnubo sa isa ka tuig nga residente ini sang lugar kun sa diin sini tuyo nga magpa-eleher.
