Nagalaum ang goalkeeper sang Philippine women’s national football team nga madugangan pa ang goals sang Pilipinas sa maragtason sini nga pagpasakop sa nagapadayon nga 2023 FIFA Women’s World Cup.
Suno kay Olivia McDaniel nga amo man ang ginhingadlan nga Player of the Match matapos ginlutos ang New Zealand, para sa tanan ang ila nga nahimo gani nagalaum ang team nga mapasagunsunan pa ini sang masunod nga kadalag-an.
Magluwas sa maayo nga performance sang 25-anyos nga goalkeeper sa tournament, ginakabig man ini nga daku nga parte sang pagsaka sang Filipinas sa international games lakip na ang iya duha ka saves sa penalty shootout sa World Cup-clinching quarterfinal win batok sa Chinese-Taipei sa 2022 Women’s Asian Cup.
Balik trabaho naman subong kag paspas sa training ang Filipinas bilang preparasyon para sa sambuwa batok sa European powerhouse nga Norway nga amo ang ila katapusan nga maatubang sa Group A sa Auckland, New Zealand.
Nahibaluan nga kun basehan ang world rankings, pinakamataas ang Norway sa Group A nga pang-World Number 12 kun sa diin lakip man ang best players nga sanday former Ballon d’Or winner Ada Hegerberg kag Barcelona superstar Caroline Graham Hansen.
Apang kun basehan naman ang performance subong nga World Cup, nalutos ini sang New Zealand 1-0 sa imbukada nga hampang kag nagtapos naman sa goalless draw ang ikaduha sini nga hampang kun sa diin nakasumpong sini ang Switzerland.
Balantayan sa Domingo ang hampang sang Pilipinas kag Norway sa Eden Park sa Auckland.
