ILOILO CITY – Ginpa-Bombo sang mga pumuluyo sang Barangay Bolilao, Mandurriao ang ongoing repair sang isa ka mataas nga building bangud sang mga debris nga nagakalahulog.
Sa interview sang Bombo Radyo kay Jolly Lopez, residente sang lugar, iya ginpahayag nga maswerte nga sa atop lamang niya nahulog ang dako nga tubo.
Suno kay Lopez, masami nga madamo ang tawo sa nasambit nga lugar gani tuman ka delikado sa tion nga may mahulog pa nga mga debris.
Pahayag niya, tuman ka kulang sang safety measures nga ginapatuman sa construction bangud nga delikado para sa ila.
Nagalaum naman ang natungdan nga maislan ang atop niya nga naguba matapos nga nahulugan sang debris.
Sa interview naman sang Bombo Radyo sa safety officer sang construction nga si Froilan Rabara, nakalab-ot na sa management ang natabo.
Posible suno sa iya nga i-repair ang naguba nga atop ukon bayaran ang kahalitan.
