ILOILO CITY – Wala sang may nakita nga problema si Iloilo City Vice Mayor Jeffrey Ganzon sa pagpangutang ni Councilor Alan Zaldivar sa Iloilo City Government Employees Multi-Purpose Cooperative.
Ini ang kasunod sang pagbuyagyag ni Councilor Romel Duron sa iya nga privilege speech kahapon nga kabahin man si Zaldivar sa may mga utang sa kooperatiba.
Nagdepensa naman si Zaldivar nga wala niya gin-abuso ang kooperatiba sa iya nga loan bangud nag-agi ini sa insakto nga proseso kag bilang myembro sang kooperatiba, gin-gamit lang niya ang amo nga prebilihiyo.
Sa interview sang Bombo Radyo kay Vice Mayor Ganzon, iya ginpahayag nga wala man sang problema kun mag-utang si Zaldivar sa kooperatiba kun nag-comply ini sa tanan nga mga requirements kag kun masarangan niya ini nga bayran.
Ginbasol man ni Ganzon ang kooperatiba nga amo ang may sala kag indi ang mga nag-utang bangud kaangay nga wala ini na-manage sang maayo.
Sa paglawag naman ni Duron sang mga pangalan sang mga nag-utang sa kooperatiba, ginpahayag sang bise alkalde nga dapat nga nagpangayo anay sang pahanugot ang konsehal nagikan sa mga natungdan agud nga indi maglapas sa Republic Act No. 10173 ukon ang Data Privacy Act.
Gin-athag man niya nga wala siya nakahibalo nga lawagon ini ni Duron.
Suno sa iya, ang majority floor leader ang nagapasulod sang tanan nga agenda sang tagsa ka session.
Mas maayo kuntani suno sa bise alkalde nga na-screen anay ang amo nga speech.
