ILOILO CITY – Estable pa ang status sang Iloilo Provincial Employees and Community Multi-Purpose Cooperative nga may asset nga nagabalor P170 million tubtob P180 million.
Sa interview sang Bombo Radyo kay Iloilo Provincial Cooperative Development Officer Atty. Arturo Cangrejo, iya ginpahayag nga may yara sila sang mga investments sa real estate kag water refilling business magluwas sa pag-extend sang loans sa ila mga myembro.
Sa subong, nagalaum si Atty. Cangrejo nga makompleto ang payment para sa land property sa Mandurriao, Iloilo City subong nga bulan bilang kabahin sang ila nga investments.
Sa pihak sang mga issue nga ginapangatubang sang iban nga kooperatiba suno sa iya, dapat nga mahibaluan sang publiko nga “good vehicle” ang cooperativism agud nga makabulig kag ma-empower ang mga tawo.
Pahayag ni Atty. Cangrejo, ang basic idea sang kooperatiba amo nga naga-organize sila indi lang sa katuyuan nga maghatag sang pautang sa mga myembro kundi luyag nila nga mag-promote kun paano nga mangin mahinalungon sa kwarta kag mangin makinot.
Dugang pa niya, bukas man nga magbulig ang Iloilo Provincial Employees and Community Multi-Purpose Cooperative sa Iloilo City Government Employees Multi-Purpose Cooperative kun kinahanglan kag kun maghingyo sila sang bulig.
Apang nagalaum si Atty. Cangrejo nga mapalapit ang Iloilo City Government Employees Multi-Purpose Cooperative sa ila.
