ILOILO CITY – Arestado ang isa ka kargador sang isa ka trucking company sa ginpatigayon nga drug buy-bust operation sang Philippine Drug Enforcement Agency Region VI upod sa Provincial Office sa Barangay Mansaya, Lapuz, Iloilo City.
Ang subject amo si Aubrey Nilay, residente sang nasambit nga lugar kag yara sa regional target list sang ahensya.
Nabaklan siya sang lima ka gramo sang ginapatihan droga kag nakuhaan dugang sang pito ka sachet.
Sa interview sang Bombo Radyo kay Agent III Jose Ramir Batuigas, Provincial Officer sang Philippine Drug Enforcement Agency- Iloilo, iya ginpahayag nga masobra duha na ka bulan nga gina-monitor ang durugista kag natukiban nga nagakuha sang supply sang ilegal nga droga sa Barangay Bakhaw, Mandurriao.
Padayon man nga gina-verify sang otoridad ang posibilidad nga kilala na ni Nilay ang iban pa nga mga durugista nga una na nga nadakpan sang mga kapulisan sa amo nga barangay.
Suno pa kay Batuigas, ang bag-o nga modus sang durugista amo ang ginatawag nga “dead drop” ukon ginaputos ang droga kag ibilin sa isa ka lugar.
Ang transaction ang ginapatigayon pinaagi sa cellphone kag ang baydanay ang ginapa-agi sa isa ka electronic payment service.
Ginkumpirma naman sang mga opisyal nga si Nilay ang nadala man sa monitoring sang ila nga Barangay Anti-Drug Abuse Council.
