ILOILO CITY – Madamo sang indi pabor sa ginaduso nga pagpatuman sang “rush hour rate” para sa public buses kag jeepneys.
Ang “rush hour rate” ang gin-petition sang mga transport groups sang Oktubre sang nagligad nga tuig kun sa diin, ang mga traditional kag modern jeepneys ang maga-charge sa tagsa ka pasahero sang dugang nga P1 kag P2 para sa mga public buses sa tunga-tunga sang ‘las-singko tubtob ‘las-otso sa aga kag ‘las-kwarto tubtob ‘las-otso sa gab-i magluwas lamang sa adlaw sang Domingo kag national holidays.
Ang rason sang mga trasport groups sa pagduso sini amo ang pagsaka sang presyo sang gatong, mataas nga operational cost bangud sa inflation kag ang “rush congestion”.
Sa interview sang Bombo Radyo kay Tatay Raymond nga manug-sugba sa isa ka food establishment, iya ginpahayag nga dako na nga bagay para sa iya ang dugang nga isa ka piso.
Suno sa iya, nagsaka na ang pamasahe kag posible nga magasaka pagid gani, mabug-at na para sa commuters.
Sa interview naman sang Bombo Radyo kay Johna Mae Grace Losa, senior high school student sa isa ka unibersidad sa syudad, iya ginpahayag nga indi siya pabor sa ginaduso nga “rush hour rate” bangud limitado lamang ang iya nga allowance.
Dugang pa niya, bilang isa ka active student, may mga tyempo nga nagabalik siya sa eskwelahan apisar nga rest day.
Suno naman kay Nanay Merci sang Pavia, Iloilo, malayo pa ang ila ginapuli-an adlaw-adlaw kag lima sila nga nagabyahe gani tuman na ka dako para sa ila kun dugangan pa ang pamasahe.
Suno sa iya, nagamahal na ang mga balaklon gani indi na sila makasarang pa bangud nga madamo ang ila nga estudyante.
Sa isa ka adlaw suno sa iya, nagadangat sa P200 ang ila nga pamasahe.
