ILOILO CITY – Diri sa kalibutan, maswerte ka na kun makabaton ka sang sulu-sobra sa imo nga regular nga sweldo.
Apang, paano kun ang mabaton mo nga sweldo indi lang sulu-sobra kundi sobra-sobra gid?
Sa Hungary, isa ka lalaki ang gin-terminate sa isa ka kumpaniya matapos ang manubo gid lamang nga pagtrabaho.
Nagsweldo siya sang kabug-usan nga 92,549 forints ukon halos P15, 000 lamang.
Apang, ano man nga ka-swerte sang empleyado bangud nga nagsala ang iya employer sa pag-wire sang iya sweldo.
Ang gin-wire sa iya ang nagdangat gid sa 367 ka pilo sang iya nga sweldo.
Austrian bank account ang ginhatag sang lalaki gani, ginbayaran siya sa local currency nga euros.
Sa baylo nga i-convert ang forints sa euro, nakabaton ang lalaki sang 92,549 euros ukon P5.5 million.
Sang na-realize na sang employer ang sala, gin-contact niya ang lalaki kag gin-ayo nga ibalik ang sobra nga kwarta apang nagpamalibad ini.
Sang ulihi, nagpangayo sang bulig ang kompaniya nagikan sa Kaposvár District Prosecutor’s Office kag na-freeze ang Austrian bank account sang lalaki.
Natigayon man nga mabalik ang kwarta apang nagdangat lamang ini sa 72,000 euros ukon P4 million.
