ILOILO CITY – Nakuha sang Filipina actress nga si Max Eigenmann ang Best Actress award sa 2023 ASEAN International Film Festival and Awards.
Ang acting skills ni Max sa iya 2022 film nga “Kargo” ang nag-impress sa international film festival judges.
Ang iya pelikula ang nagapakita sang istorya sang babayi nga si Sara kun sa diin, ang bug-os niya nga pamilya ang napatay sa isa ka aksidente sa motorsiklo sa Iloilo. Ang lead character ang nagtimalos bangud sa pagpati nga ang iya pamilya ang hungod nga ginpamatay.
Samtang, ang director nga si Carlo Obispo ang nagdala man sang dungog sa pungsod matapos gin-recognize bilang Best Director sa film festival sa iya pelikula nga “The Baseball Player.”
Ang pelikula nga nagasaysay sang kabuhi sang isa ka Moro child soldier nga nagahandum nga mangin atleta ang top honor man sa 18th edition sang Cinemalaya Independent Film Festival sang nagligad nga tuig.
Napili-an man ini bilang entry sa Asian Competition category sang 21st Dhaka International Film Festival sang 2022.
