ILOILO CITY – Gindayaw kag ginapanginbulahan sang Iloilo Provincial Health Office ang Pototan Rural Health Center and Birthing Clinic bilang labing una nga government facility sa Western Visayas nga ginhatagan sang Department of Health sang License to Operate bilang Primary Care Facility.
Ang Primary Care Facility regulation ang kabahin sang katuyuan sang Universal Health Care (UHC) Act nga masiguro nga safe kag kalidad ang primary care services nga ginahatag sa mga Filipinos.
Sa interview sang Bombo Radyo kay Dr. Maria Socorro Quiñon, head sang Iloilo Provincial Health Office, iya ginpahayag nga na-inspire man ang iban nga mga rural health units kag nagalaum man sila nga mangin primary care facility sa palaabuton.
Pinaagi sa pag-upgrade sang health care facilities, ginasiguro ni Dr. Quiñon nga mapasangkad pa ang delivery sang medical kag health services sa mga residente sang Pototan.
Pahayag niya, na-comply sang pasilidad ang tanan nga requirements sa idalom sang Department of Health Administrative Order No. 2020-0047 ukon ang Rules and Regulations Governing the Licensure of PCFs in the Philippines.
Antes gin-grant ang license sa Primary Care Facility, gin-asess kag gin-validate ang available services sa Rural Health Unit, manpower, capability, capacity kag iban nga requirements agud masiguro nga ma-comply ang licensing standards kag requirements sa Department Order 2020-0047.
