ILOILO CITY – Nadakpan ang isa ka lalaki nga ginakabig nga High Valued Target matapos ginserbehan sang tatlo ka mga search warrants may kaangtanan sa nagkalain-lain nga mga kaso sa Brgy. Canabajan, Calinog, Iloilo.
Ang arestado amo si Roel Cerbellos, 39, kasado, residente sang amo nga lugar.
May kaangtanan ang search warrants sa kaso nga paglapas sa RA 9165 ukon Comprehensive Dangerous Drugs Act of 2002, RA 10591 ukon Comprehensive Firearms and Ammunition Regulation Act, kag RA 9516 ukon Unlawful Possession of Explosive Device.
Sa interview sang Bombo Radyo kay PMaj Myles Dieron, hepe sang Calinog Municipal Police Station, iya ginpahayag nga nadakpan ang suspek sa bulig sang pumuluyo kun sa diin mismo sa iya balay ini ginserbehan sang search warrant.
Didto nakuha sa iya ang masunod: 35 grams sang shabu nga may market value nga P315, 000; 45 calibre pistol; kag isa ka granada.
Sa subong, nakahunong na ini sa Calinog Municipal Police Station.
Nadiskubrehan man nga may mga pending man ini nga kaso kaangay sang Attempted Homicide kag Rape.
Nahibaluan nga nagaisahanon lang nga nagaistar si Cerbellos sa iya balay bangud isa ka Overseas Filipino Worker ang asawa sini.
