ILOILO CITY – Nagahanda na ang mga eskwelahan sa syudad para sa pagbukas sang klase sa Agosto 29.
Sa interview sang Bombo Radyo kay Mrs. Delorah Cecilia Pantillo, Principal IV sang Iloilo National High School, iya ginpahayag nga nagpatigayon na sila sang pre-consultation meeting upod sa in-charge sang eskwelahan kag may patigayunon man nga pagsinapol upod sa nagkalain-lain nga mga stakeholders.
Suno kay Pantillo, ang Brigada Eskwela ang hiwaton sa Agosto 14-19.
Katuyuan sini nga aktibidad nga mahanda ang eskwelahan para sa pagbalik sang mga estudyante.
Tatlo ka adlaw antes ang pagbukas sang klase, ginpahayag ni Pantillo nga magapatigayon sila sang spraying kag misting sa bilog nga eskwelahan agud nga ang mga estudyante ang indi matapikan sang dengue.
Samtang, sa Iloilo City National High School, magapatigayon sang caravan ang eskwelahan sa palibot sang distrito sang Molo.
Sa interview sang Bombo Radyo kay Alpha Java, Principal IV sa nasambit nga eskwelahan, iya ginpahayag nga sa amo nga caravan, ipahibalo sa mga estudyante, ginikanan kag sa kumunidad nga mag-amat-amat na sa pagpaninlo sa eskwelahan.
Suno sa iya, magluwas sa mga estudyante kag mga ginikanan, maga-imbitar man sila sang mga personnel nagikan sa Bureau of Fire Protection, Philippine National Police, mga barangay officials kag iban pa agud nga mag-ugyon sa pagpaninlo.
Kadungan sang Brigada Eskwela, patigayunon man ang enrollment.
