ILOILO CITY – Nakahanda na ang Tubungan Municipal Police Station sa pala-abuton nga Barangay and Sangguniang Kabataan Elections 2023.
Sa interview sang Bombo Radyo kay Police Captain Rodel Ojano, hepe sang Tubungan Municipal Police Station, iya ginpahayag nga nahitso na ang security plan para sa eleksyon apang nagakinahanglan sila sang dugang nga personnel nga i-augment sa tagsa ka barangay.
Suno kay Ojano, nagaplano ini nga butangan sang duha tubtob tatlo ka mga personnel ang kada isa sa 48 ka barangay sa banwa.
Base sa assessment sang kapulisan, apat ka mga barangay ang gin-classify nga areas of immediate concern bangud sa presensya sang ginapatihan rebelde nga grupo.
Ini ang ginalakipan sang Boloc, Bikil, Navillan kag Nagba nga nagaserbe alagyan ukon transient point sang rebelde.
Ang Tubungan ang nalakip sa listahan sang “orange category” sa “areas of immediate concern” sa probinsya base sa classification sang Commission on Elections sa election hotspot.
Sa subong, ginapahayag ni Ojano nga kulang pa ang ila personnel agud nga magbantay 24 oras.
Bangud sini, nagpanugyan ang hepe sa mga pumuluyo sang Tubungan nga indi magduha-duha sa pagpalapit sa mga kapulisan sa tion nga may makaduluda kag kinahanglan ang presensya sang mga kapulisan agud nga mahatagan sang nagaka-igo nga seguridad.
