Gin-ako ni President Ferdinand Marcos, Jr nga indi bastante nga suporta ang ginahatag sang gobyerno sa mga atletang Pinoy apisar pa sang ila pangabudlay agud makadala sang dungog sa pungsod Pilipinas.
Lakip ini sa kaundan sang iya nga speech sang nagpanghatag sang insentibo sa mga atleta nga nakadaog sang mga medalya sa 32nd Southeast Asian Games kag sa 12th ASEAN Para Games, Agusto 9.
Suno kay Marcos, ginakahuya niya nga makit-an ang kulang nga suporta sa mga atleta, apang sa pihak sini, gindayaw niya ang pagka-pursigido sang mga Pinoy nga rason nga nagakampyon sa gihapon kag maayo ang performance.
“I am always a little embarrassed when I see that we are not supporting our athletes and our coaches and our trainers and all the support groups. Even their families. Alam naman natin, hindi kayo naging champion na nag-iisa,” pahayag sang presidente.
Nagpasalig si Marcos nga buligan sang iya nga administrasyon ang Filipino athletes sa ila tagsa ka sports.
Base sa rekord sang Presidential Communications Office, yara sa masobra 900 ka mga atleta ang nagpasakop sa SEA Games kag ASEAN Para Games sang Mayo kag Hunyo 2023 sa Cambodia. Sa overall tally, nagpang-lima ang Pilipinas nga may 58 kag 34 ka gold medals sa amo nga mga hinampang. #
