ILOILO CITY – Nagpasalig si Iloilo City Councilor Romel Duron nga buligan niya ang mga investors kag myembro sang Iloilo City Government Employees Multi- Purpose Cooperative nga magpasaka sang kaso batuk sa mga Board of Directors kag opisyal nga mapamatud-an nga may kaangtanan sa anomaliya.
Sa interview sang Bombo Radyo kay Councilor Duron, iya ginpahayag nga pagkatapos sang iya privilege speech sa session sang Iloilo City Council, may mga investors nga nagpalapit sa iya, lakip na ang iya kaugalingon nga utod, agud nga magpangayo sang bulig nga makuha ang ila kwarta.
Suno kay Duron, madugayan pa kag ma-withdraw sang mga investors ang ila kwarta apang tuman lang ka dasig mag-loan ilabi na ang mga opisyal kag board of directors sang kooperatiba.
Tipunon sang iya opisina ang tanan nga affidavit sang mga tagreklamo kag magapangayo man sang bulig nagikan sa National Bureau of Investigation para sa dugang nga imbestigasyon.
Nagpanindugan si Duron nga ang mga board of directors kag ang mga officers ang dapat nga basulon sa natabo kag mangin liable sang kaso.
Apang suno sa iya, sa tion nga mapamatud-an nga may mga nag-loan man nga nagaserbe dummy, ilakip man sila sa pasakaan sang kaso.
Dugang pa niya, base sa layi, syndicated estafa ang ipasaka nga kaso batuk sa lima ukon masobra pa nga mga indibidwal nga naghimbun agud nga himuon ang anomaliya.
Mahimo man nga mapasaka ang kaso nga large-scale estafa batuk sa isa ukon sa apat ka mga indibidwal nga na-angut sa anomaliya kag masobra sa P100, 000 ang balor sang kwarta nga nadalahig.
Pahayag pa ni Duron, dapat nga mabalik ang kwarta sang mga investors kag makabayad ang mga nag-loan.
