ILOILO CITY – Ginakasubo sang Iloilo City Police Office ang liwat nga pagkadakop sang mga durugista nga una nga naka-avail sang plea bargaining agreement.
Sa idalom sang plea bargaining framework, ang akusado sa paglapas sang Section 5 sang Republic Act No. 9165 ukon Comprehensive Dangerous Drugs Act of 2002 ang pahanugutan nga mag-plea bargain kun ang kabug-aton sang droga nga nakuha sa iya ang indi maglapaw sa 0.99 gram.
Mahimo man nga maka-avail sang plea bargaining agreement ang akusado sa paglapas sang Section 12 sang amo nga layi ukon ang illegal possession sang equipment, instrument, apparatus kag iban nga paraphernalia para sa droga ang may penalidad nga anum ka bulan kag isa ka adlaw tubtob apat ka tuig nga pagkapreso kag multa nga P10,000 tubtob P50,000.
Sa interview sang Bombo Radyo kay Police Lieutenant Colonel Antonio Benitez, Jr., pinuno sang Iloilo City Drug Enforcement Unit, iya ginpahayag nga nagalaum kuntani sila nga magabag-o na ang mga ini apang sa subong, madamo sa gihapon ang nagkaladakpan.
Suno kay Benitez, ang mga durugista nga nag-avail sang sini nga benepisyo ang nakakita sang koneksyon sa sulod sang jail facility.
Pahayag niya dugang, gina-avail nila ini agud nga makabaligya naman liwat sang iligal nga droga.
Kalabanan pa sa mga ex-convict suno sa natungdan ang nagapositibo sa paggamit sang droga kag dalagko na ang makuha sa ila.
Nagpanawagan man ini sa mga ginhatagan sang ikaduha nga tsansa nga indi na magbalik sa pag-engage sa illegal drug activity.
Nagapangayo man ini sang kooperasyon nagikan sa publiko bangud nga ang away kontra sa iligal nga droga ang dapat nga buligan sang nagkalain-lain nga ahensya kag grupo.
