ILOILO CITY – Gina-enganyo sang Department of Education Region VI ang mga ginikanan sang mga estudyante nga nag-untat sa pagtuon bangud sa Coronavirus Disease 2019, nga ipa-enroll ang ila kabataan para sa school year 2023-2024.
Sa interview sang Bombo Radyo kay Mr. Hernani Escullar, Jr., spokesperson sang Department of Education Region VI, iya ginpahayag nga madamo sang mga estudyante ang nag-untat sa pagtuon bangud nga indi makasarang ang ginikanan sa pagpa-eskwela bangud sa pandemya samtang ang iban ang nagpangita na sang trabaho.
Suno kay Escullar, kinahanglan lang sang mga ginikanan nga magpadulong sa mga eskwelahan kag magkuha sang basic education enrollment form kag ipasa ang mga dokumento nga kinahanglanon.
Pahayag niya dugang, sa tion nga indi pa makumpleto ang mga requirements, mahimo ini nga ma-comply tubtob sa Oktubre 31.
Samtang, nagdangat na sa 430, 845 ang mga enrollees sa Western Visayas as of August 14.
Sa nasambit nga numero, 396, 259 ang nagikan sa public schools; 34, 226 nagikan sa private schools kag 360 sa mga state universities and colleges kag local universities and colleges nga naga-offer sang basic education curriculum.
Samtang padayon ang enrollment, nagapadayon man ang Brigada Eskwela sa mga eskwelahan.
