Nakuha sang 18-anyos nga Filipina tennis star nga si Alex Eala ang panibag-o nga titulo sa International Tennis Federation (ITF) matapos ginlutos ang Australian nga kasumpong, 6-2, 6-3, sa finals sang W25 Roehampton tournament sa London, United Kingdom.
Nagapang-250 si Eala sa world rankings sa tennis apang wala ini nangin sablag sa iya nga i-dominar ang World No. 166 kag No. 2 seed nga si Arina Rodionova sang sila ang nagsambuwa sa National Tennis Centre.
Antes ang finals, ginlutos man ni Eala si Arianne Hartono sang Netherlands sa semis kag Australian nga si Priscilla Hon sa quarters.
Ini na ang ikaapat nga professional title ni Eala sa iya nga karera matapos ang pagdaog sa 2023 W25 Yecla sa Spain; 2022 W25 Chiang Rai sa Thailand; kag 2021 W15 Manacor sa Spanish island of Mallorca.
Si Eala amo ang ginakilala nga labing-una nga Filipino nga nakadaog sang Grand Slam singles title, kag isa man siya ka produkto sang Rafael Nadal Academy. #
