ILOILO CITY – Kun ikaw ang gina-akigan sang imo iloy bangud nga wala ka pa nakahimo sang imo assignment, ano ang gina-ubra mo?
Ang iban, ginapati nalang samtang nagatalangison.
Sa China, matapos gin-akigan sang iya iloy bangud sa wala sa gihapon naubra nga assignment, isa ka 10 ka tuig nga bata ang naglayas sa ila balay kag nagpadulong sa isa ka police station agud nga magreklamo kag nagpakitluoy nga dal-on siya sa orphanage.
Ini nga insidente ang natabo sa Chongqing.
Ang 10 ka tuig nga bata ang nagpadulong sa Huixing Police Station sa Yubei kag gin-istorya ini sang duha ka mga pulis.
Matapos ang pagpakig-istorya, natigayon nga makumbinsi sang pulis ang nasambit nga bata nga ihatag ang contact information sang iya ginikanan.
Ginpakalma ang bata kag ginpasugat ini sa iya amay.
Apisar nga wala sang gana nga magpauli ang bata, ginpaathagan ini sang pulis nga ini ang maayo nga himuon sa baylo nga magpadulong sa orphanage.
Ang ini nga balita ang madasig nga gin-istoryahan sa China.
May nagahambal nga nagapakita ini sang matamad na nga henerasyon sang spoiled children samtang ang iban ang nagdayaw sa kapulisan nga nagpakalma sa bata kag nagsolbar sang problema.
