Kun may plano ka nga magbyahe sakay sa eroplano sa masunod nga bulan, dapat na nga mag-preparar sang mas daku-daku nga budget bangud sang ginalauman nga mas mataas nga plete kasunod sang saka sa fuel surcharge nga aprubado sang Civil Aeronautics Board (CAB).
Suno sa CAB, halin sa Level 4, pataason sa Level 6 sa Septyembre ang fuel surcharge nga mahimo sukton sang airlines halin sa mga pasahero.
Sa idalom sang Level 6, magabayad ang mga byahero sang fuel surcharge nga P185 tubtub sa P665 para sa domestic trips kag P610.37 tubtub sa P4,538.4 para sa international flights.
Nahibaluan nga tatlo ka bulan na halin sang Hunyo nga yara lang sa Level 4 ang fuel surcharge nga buot silingon, mas barato ang bayad sa mga eroplano.
Mahimo i-apply sang airlines ang fuel surcharge sa presyo sang ticket sang customers agud mahagan-hagan ang kapyerdehan halin sa price fluctuations sa jet fuel. #
