Patay ang driver sang motorsiklo matapos nga nakabunggo sa isa ka depampasahero nga van sa Barangay Baguingin-Lanot, Alimodian, Iloilo.
Ang biktima amo si Michael Aldamar, 40, residente sang Brgy. Tabug, Alimodian, samtang ang naga-maneho naman sang L300 van amo si Jhon Dhill Caumban, 27, residente sang Brgy. Capt. Fernando, Leon, Iloilo.
Halin sa Leon padulong sa Iloilo City ang van samtang halin naman sa Alimodian kag padulong sa Leon ang motorsiklo.
Sa interview sang Bombo Radyo kay Police Staff Sergeant Angelo Amuyan, imbestigador sang Alimodian Municipal Police Station, iya ginpahayag nga natabo ang aksidente sang nagsugat-anay ang duha sa ginakaayo nga dalan sa Barangay Baguingin-Lanot kun sa diin “one-way” lamang ang dalagan sang mga salakyan.
Nakaangkon sang pilas sa ulo ang driver sang motor kag ginhingagaw pa nga dal-on sa Aleosan Distrcit Hospital apang gin-deklarar nga dead-on-arrival.
Gin-athag naman sang pulis nga indi hubog ang driver sang van sang natabo ang aksidente. Gindala ini sa custodial facility sang Alimodian Municipal Police Station, kag ginpahayag nagpasugot ang asawa sang biktima nga aregluhon ang kaso. #
