Nag-abot na sa Pilipinas ang teams sang Ivory Coast kag Montenegro para sa closed-door tune-up game batok sa Gilas Pilipinas antes ang opisyal nga pagsugod sang 2023 FIBA World Cup.
Subong nga adlaw, Agusto 18, atubangon sang world number 42 nga Ivory Coast ang Gilas sa Philsports Arena antes ini magsaka sa group play sa Indonesia kun sa diin natuon ini sa Group G nga grupo man sang powerhouse nations nga Spain, Brazil, kag Iran.
Sa bahin sang Montenegro nga pang-18 sa world rankings, maka-sambuwa sini ang Gilas sa Domingo, Agusto 20.
Suno sa star player sang team nga si Nikola Vucevic nga nagahampang man sa Chicago Bulls, excited siya nga magbalik sa hardcourt kag makaaatubang sa Filipino-American shooting guard sang Utah Jazz nga si Jordan Clarkson.
Nagtupa ang Montenegro sa Group D kag magaatubang sa Egypt, Mexico, kag Lithuania sa group play diri sa Pilipinas.
Kasunod sang friendlies sa Ivory Coast kag Montenegro, atubangon man sang Gilas ang Mexico sa Lunes, Agusto 21.
Una na nga ginpahayag ni Gilas head coach Chot Reyes nga ini nga tune-up games ang iya basehan kun sin-o sa mga players sang Pilipinas ang ibutang sa final 12 para sa World Cup.#
