ILOILO CITY – Bukas ang Iloilo City Government nga ipagamit ang Iloilo City Hall bilang masunod nga venue sang legislative inquiry may kaangtanan sa depektibo nga Ungka flyover kag atrasado nga Aganan flyover.
Ini ang kasunod sang suhestiyon ni Kabataan Partylist Representative Raoul Manuel nga diri sa Iloilo hiwaton ang inquiry agud nga may yara sang sense of urgency sa Department of Public Works and Highways.
Ang Iloilo Provincial Government ang una na nga nagpahayag nga bukas man sila nga hiwaton ang inquiry sa probinsya.
Sa interview sang Bombo Radyo kay Iloilo City Mayor Jerry Treñas, iya ginpahayag nga may yara sang gamay nga lugar sa Iloilo City Hall nga mahimo ipagamit sang syudad kag libre lamang.
Suno kay Treñas, mangin sa diin pa ang venue sang inquiry, nagalaom ini nga may development na sa duha ka mga flyovers.
Pahayag niya, mangin siya ang nagahulat man sang desisyon kun ano ang ubrahon sa mga flyover, kun bakbakon ini ukon gub-on.
Dugang pa niya, sang nagligad nga semana, nagpadulong sa iya opisina ang officer-in-charge sang Department of Public Works and Highways Region VI nga si Engr. Sanny Boy Oropel.
Ginhambalan niya ini nga ang publiko ang nagahulat na nga masolbar ang ini nga problema.
