Sa baylo nga lunsay selebrasyon ang tutukan sang Espanya matapos ang maragtason nga kadalag-an sa FIFA Women’s World Cup, nabutang pa sa kontrobersiya ang pangalan sang football federation president sa pungsod.
Ini bangud nakit-an gid sang publiko kun paano sini gulpi nga ginhalukan sa bibig ang midfielder nga si Jenni Hermoso sang tion nga naga-selebrar ang tanan bangud nalutos sang Espanya ang England sa Final match.
Matapos nga ginpasuksok sang football federation chief nga si Luis Rubiales ang gold medal sa mga myembro sang Spanish team, ginpanghakos sini ang mga players apang pag-abot kay Jenni, wala gid ini nakapugong kag nahalukan niya ini.
Sa locker room naman sang players, nagpanugid si Jenni nga wala siya nanamian sa amo nga halok; apang sang nagpaguwa na sang formal nga statement, ginsiling sini nga wala lang sa iya ang amo nga insidente bangud bunga ini sang tuman nga selebrasyon sang kada isa kag isa ini ka “natural gesture”.
Nagpangayo naman sang pasaylo ang football chief sa iya nga sala kag gin-ako ang iya nga ginhimo.
“I will learn from this and understand that when you are president of an institution as important as the Federation especially in ceremonies and in this type of matters, you have to be more careful,” pahayag sang football chief.
Mangin ang mga ministers sang gobyerno kag ang media commentators sa Espanya ang nagpakamalaot sa amo nga gesture.
Nagmandu man si acting Culture and Sports Minister Miquel Iceta kay Rubiales nga maghatag sang paathag kasunod sang amo nga insidente nga iya gintawag nga “unacceptable”.
Nahibaluan nga tuman ka daku nga topiko ang gender issues sa Espanya.
Suno kay acting Gender Equality Minister Irene Montero, ang non-consensual kiss ukon ang gulpi-gulpi lang nga halok nga wala ginapangayo ukon gintugtan, ang makabig nga isa ka sex violence nga adlaw-adlaw ginasuprer sang mga kababainhan apang daw wala lang sa gihapon nahatagan sang nagakaigu nga igtalupangod. #
