Samtang nagalawig ang FIBA World Cup 2023, labi nga ginapamatud-an sang Team USA nga sila ang ‘team to beat’ sa sini nga edition.

Nag-skor ang Los Angeles Lakers guard nga si Austin Reaves sang 15 puntos para sa national team samtang may tag-13 puntos naman sanday Jalen Brunson kag Anthony Edwards para pangunahan ang Estados Unidos nga tumbahon ang Greece, 109-81, sa Group C.

Ang Greece amo kuntani ang gina-konsiderar nga pinakadaku nga kasumpong sang US sa group phase bangud nagapang-siyam ini sa FIBA standings. Ginalantaw nga daku nga epekto ang kadulaan sang Greek star nga si Giannis Antetokounmpo nga rason kun ngaa wala nasarangan sang pungsod ang pwersa sang rising NBA stars sang US.

Sunod nga atubangon sang American team si Rondae Hollis-Jefferson kag ang team sang Jordan sa Myerkules, Agusto 30.