ILOILO CITY – Napaslawan ang Gilas Pilipinas nga mag-advance sa second round sang FIBA Basketball World Cup 2023.
Ini ang kasunod sang kalutusan sang team sa world No. 10 nga Italy sa hampang nga ginpatigayon sa Araneta Coliseum, 90-83.
Bangud sini, ang Pilipinas ang naga-isahanon nga host country nga nalutos sa una nga tatlo ka hampang humalin sang 1982.
Nagtapos ang Italy bilang second seed sa Group A sunod sa Dominican Republic kag maga-advance sa second round.
Antes ang hampang, buhi pa kuntani ang paglaum sang Gilas nga maka-abanse sa masunod nga round sang tournament bangud nga ginlutos sang Dominican Republic ang Angola.
Apang, kinahanglan nila sa gihapon nga lutuson ang Italy sa abanse nga 13 points agud nga makuha ang second seed sa Group A.
Wala ini natabo sa baylo, ginsakit sang mga Italyo ang tagipusuon sang mga Filipino sa atubangs ang 11,000 fans sa Big Dome.
Anum ka mga players sang Italy ang nag-deliver sang double digits kun sa diin, tanan man sila ang naka-contribute nagikan sa three points area.
Apisar sang kalutusan, ginpahayag ni Gilas Pilipinas head coach Chot Reyes, nangin maayo ang hampang sang iya nga team.
Suno sa iya, ang effort sang mga players ang dapat nga ipabugal sa gihapon.
Gindayaw man niya ang mga players bangud sa pagbato sa gihapon kasunod sang kalutusan sa Dominican Republic kag Angola.
Nakahimo naman sang panibag-o nga record ang Filipino-American NBA star nga si Jordan Clarkson.
Sa hampang kagab-i, nangin top scorer liwat si Clarkson nga may 23 points, 7 rebounds, 6 assists, kag 1 steal.
Si Clarkson ang labing una nga player nga nag-combine sang masobra 20 points kag masobra sa lima ka mga assists sa iya una nga tatlo ka mga hampang sa FIBA World Cup.
Siya man ang ikawalo na nga player nga naka-score sang masobra 20 points sa tagsa ka hampang.
Suno sa Utah Jazz star, nangin mabudlay man ang ila hampang apang siguro siya nga ginhatag nila ang ila nga masarangan.
Nagpanawagan naman si Rhenz Abando sa mga Filipino fans nga indi dapat pag-i-bash ang iya mga teammates kag ang mga coaches sang Gilas Pilipinas kasunod sang kapyerdehan sang team sa Italy.
Suno kay Abando, tawo lamang ang mga nagabug-os sa team nga nagakasala man.
Pahayag niya, ginhimo man nila ang ila masarangan.
Naghingyo man ini sang suporta nagikan sa mga fans bangud suno sa iya, ang tanan nga ginahimo sang team ang para man sa bilog nga pungsod.
Samtang, ginpahayag man niya nga nakulangan siya sa iya performance sa hampang.
Si Abando ang nakatipon sang 8 points, 2 rebounds kag isa ka block.
