ILOILO CITY – Isolated ang halos 250 ka mga pamilya nagikan sa duha ka mga barangay sa Guimbal, Iloilo bangud liwat nga nautod ang ginakay-o nga Lubacan overflow bridge.
Sa interview sang Bombo Radyo kay Maricon Gea, pinuno sang Municipal Disaster Risk Reduction and Management Office sang Guimbal, Iloilo, iya ginpahayag nga 191 ka mga pamilya sa Barangay Lubacan ang isolated samtang 57 naman sa Nito-an Lupsag.
Suno kay Gea, nautod ang taytay bangud sa mabaskog nga ulan nga nagresulta sa makusog nga tubig-baha nagikan sa Tangyan River.
Nakahatag naman sang family food packs ang local government unit sang Guimbal.
Bangud nga na-utod ang taytay, nag-agi sa Barangay Katiringan, Igbaras ang mga nagdul-ong sang bulig.
Kung madumduman, sang nagligad nga tuig, nautod man ang nasambit nga taytay.
