ILOILO CITY – Wala sang may nakita nga problema ang chairman sang Committee on Transportation sa Iloilo City Council may kaangtanan sa pagtunga sang Public Safety and Transportation Management Office.
Ang Public Safety and Transportation Management Office ang may lima ka mga division nga ginalakipan sang Anti-Squatting and Illegal Structures Unit, Iloilo City Police Auxiliary Unit, Transportation Management Unit, Special Services Division kag Public Safety Unit.
Base sa una nga pahayag ni Iloilo City Mayor Jerry Treñas, i-separar ang traffic management sa nasambit nga talatapan.
Ini ang pamunuan ni retired Police Colonel Uldarico Garbanzos nga nagaserbe nga Executive Assistant for Community Welfare.
Magapabilin naman nga pinuno sang iban nga division si Mr. Jeck Conlu.
Sa interview sang Bombo Radyo kay Iloilo City Councilor Atty. Sedfrey Cabaluna, chairman sang Committee on Transportation, iya ginpahayag nga may yara sang mga benepisyo ang pagseparar sang traffic management.
Suno sa iya, mas matutukan na sang maayo ang dalagan sang trapiko sang syudad kag makita ang mas maayo nga implementation.
Pahayag niya, tuman ka lapad sang scope sang talatapan gani, may mga kakulangan man ini.
Mas maayo man suno sa iya nga mas madamo sang tawo ang nagapanumdom.
Kun madayon ini suno sa natungdan, ginalauman nga mangin maayo na ang serbisyo sang traffic management office.
