Gina-istoryahan subong ang ginapahayag ‘shady’ nga pahayag sang aktor nga si Jake Ejercito kag kun sin-o nga pulitiko ang iya ginapabati-batian kasunod sang hampang sang Gilas Pilipinas batok sa China sa classification round sang FIBA World Cup 2023.
Isa si Jake sa naglantaw sa hampang kaupod ang iya anak nga si Ellie kun sa diin ang una nga post sini ang may caption, “West Philippine Sea is ours!!”
Sa separado nga post, pahayag sang aktor, “But lol at those wearing “West Philippine Sea” shirts but were as still as the grave between 2016-2022.”
Wala sang pangalan nga gin-mensyonar apang madasig ang publiko sa pag-angot sini sa pictures sang mga senador nga nagasuksok sang shirts nga may naka-imprinta nga “West PH Sea”.
Lakip sa yara sa pictures amo sanday Senators Christopher “Bong” Go, Ronald “Bato” dela Rosa, Sonny Angara, kag Joel Villanueva kag Senate President Migz Zubiri.
Si Jake amo ang anak sang former actress nga si Laarni Enriquez kay ex-President Joseph Estrada nga kaalyado ni former President Rodrigo Duterte. #
