Nagpahayag sang suporta ang National Economic and Development Authority (NEDA) sa price ceiling nga ginmandu ni President kag Agriculture Secretary Ferdinand Marcos, Jr. para sa bugas kasunod sang pagsaka sang presyo sini sa mga merkado.
Suno sa ahensya, ang price ceiling ang temporaryo lamang nga tikang nga magabulig sa iban pa nga mga inisyatibo sang iban nga ahensya sang gobyerno batok sa hoarders kag smugglers amo man sa nagapartisipar sa rice cartel.
Photo: KJ Rosales
Nagasalig man ang ahensya nga malapit na lang ang tag-alani sang humay sa pungsod.
Sa executive order sang presidente, ginmandu ang P41 per kilogram nga price cap para sa regular-milled rice, kag P45 per kilogram para naman sa well-milled rice.
Epektibo ini buwas, Septyembre 5.
Nagkomiter naman si House Speaker Ferdinand Martin Romualdez nga magpamati kag i-addess sini ang mga reklamo sa price cap.
Suno sa house speaker, maga-istorya siya sa mga lider sang rice retailers sa ila concern nga mapierde sila sa kita.
Ginpahayag man sini nga ginatun-an niya nga hatagan sang ayuda ang mga retailers nga apektado sang adjustment sa presyo.
Una na nga naghingyo ang Department of Trade and Industry (DTI) sa rice retailers nga magsakripisyo anay sang gamay para sa ikaayo sang publiko.
Nahibaluan nga base sa latest nga data nga nakuha sang Department of Agriculture (DA), yara sa P42.00 to P65.00 per kilogram ang presyo sang local commercial rice sa mga merkado kag P43.00 to P65.00 per kilogram naman ang imported commercial rice depende sa variety.#
