Isa ka kasado nga babayi nga may anak na ang ipadala nga kandidata sang pageant powerhouse nga Colombia para sa Miss Universe 2023 nga patigayunon sa El Salvador.
Ini amo ang 27-anyos nga si Camila Avella nga nagpangibabaw sa 23 ka iban pa nga aspirants sa Miss Universe-Colombia.
Isa ka TV presenter si Camilla kag may yara na sang duha ka tuig nga anak.
Tinguhaan sini nga madala pauli ang ika-tatlo nga Miss Universe crown para sa Colombia matapos nga nakuha man ini sang pungsod sang 1958 kag sang 2014.
Ini ang una nga tuig nga ginpahanugutan na sang Miss Universe Organization ang mga iloy kag kasado na nga mga babayi nga mag-compete sa amo nga international pageant.
Antes ang Colombia, una na naka-anunsyo ang pungsod Guatemala nga magapadala man sila sang 28-anyos nga pageant veteran nga si Michelle Cohn, isa ka iloy nga may duha ka anak, agud nga mag-compete man sa amo nga pageant stage.
Patigayunon ang coronation show sang 2023 Miss Universe pageant sa Nov. 18 (Nov. 19 sa Manila).
Ang Filipino-American sustainable fashion designer kag advocate nga si R’Bonney Gabriel nga tiglawas sang United States amo ang maga-turn over sang korona sa iya mangin successor. #
