ILOILO CITY- Nagtukod ang Iloilo Provincial Government sang crab hatchery sa banwa sang Concepcion, Iloilo partikular sa Northern Iloilo State University (NISU) agud ma-address ang naganubo nga supply sang blue swimming crab ukon kasag.
Sa interview sang Bombo Radyo kay Dr. Ildefonso Toledo, Provincial Agriculturist, iya ginpahayag nga nasgsugod ang pagtukod sang hatchery sang 2018 sang tion ni fomer Governor Arthur Defensor Sr. agud buligan ang mga fisherfolk nga ma-revive ang crab industry.
Suno kay Toledo, ginpainan sang P5 million ang construction sang hatchery apang nag-untat sang tion sang pandemya kag gindugangan naman sang budget ni Governor Arthur Defensor Jr. pagkatapos sang pandemya agud makompleto ang tanan nga equipment kag pasilidad.
Nagpangabay naman ini sa mga fisherfolks nga hagan-haganon lang ang pag- harvest sini kag likawan ang pagkuha sang nagabihod nga mga kasag agud mangin sustainable ang ila palangabuian.
Dugang ni Toledo, bangud yara sa sulod sang Northern Iloilo State University ang hatchery, makatuon man ang mga estudyante sang techniques sa pagpadamo sang amo nga kasag.
Nahibaluan nga ang Concepcion ang ginakabig isa sa mga producers sang blue crab sa Pilipinas.
