Mapinasalamaton ang 23-anyos Filipino-Cypriot big man nga si AJ Edu sa FIBA World Cup debut sini kaupod ang Gilas Pilipinas.
Sa iya Facebook post, ginpahayag sini nga nga “blessing” para sa iya ang pagtiglawas sa world stage apisar sang mga pagpanghangkat kag injuries.
Sa kabug-usan nga kampanya sang Gilas subong nga tournament, nagtupa si Edu sa Top 10 sa World Cup group phase sa rebounding nga may team-best nga 8.6 kada hampang apisar nga siya ang ikaduha nga pinalamharon nga Gilas player sunod kay Kai Sotto.
Nagpangatlo man siya sa scoring sang Gilas nga may 8.2 points kun sa diin nauna lang sanday Jordan Clarkson (26.0) kag Dwight Ramos (13.2).
Sa 21-puntos nga abanse sang Gilas sa China sa katapusan nga hampang sa classification round, nagtapos man si Edu nga may 10 rebounds, lima ka puntos, kag tatlo ka assists.
