Lakip sa gin-report ni President Ferdinand Marcos Jr. sa iya pagbalik diri sa Pilipinas halin sa 43rd ASEAN Summit sa Indonesia amo ang free trade agreement (FTA) nga pirmado na sa tunga sang Pilipinas kag South Korea.
Ini ang ginalauman nga magapabakod pa sang relasyon sang duha ka pungsod pag-abot sa investment kag makahatag sang dugang nga trabaho para sa Filipinos.
Ini nga kasugtanan ang madugay na nga ginanegosyar — antes pa man nagtuhaw ang Covid-19 pandemic — kag amo ang ginalauman nga magabuhin sang taripa para sa pili nga mga produkto.
Nahibaluan nga lab-ot sa $15.44 billion ukon P876.7-billion ang bilateral trade sa tunga sang Pilipinas kag South Korea sa sulod lamang sang 2022.
Ang amo nga pungsod amo ang ika-apat nga pinakadaku nga trading partner sang Pilipinas sandig sa data sang Department of Trade and Industry (DTI).
Ang nagapanguna nga gina-export sang Pilipinas sa South Korea amo ang integrated circuits, semiconductors, kag ang saging. #
