ILOILO CITY – Nagpanindugan ang Philippine Coast Guard nga wala naglapas ang Ferry 12 sa ginapahanugutan nga numero sang mga pasahero.
Ini ang baliskad sa reklamo nga nabaton sang Bombo Radyo nga may excess passenger sa amo nga fiber glass boat.
Sa litrato nga ginpalab-ot sa Bombo Radyo, may yara sang pila ka mga indibidwal nga nagapungko na sa hagdan sang amo nga sakayan.
Sa interview sang Bombo Radyo kay Commander Paterno Belarmino, Jr., commander sang Philippine Coast Guard- Iloilo Station, iya ginpahayag nga ang picture ang kuha antes maghalin sa Parola Wharf ang Ferry 12.
Suno kay Belarmino, 172 ang capacity sang fiber glass boat apang 157 lamang ang nakasakay.
Pahayag niya, may iban nga grupo sang pasahero nga ginpili nga mag-updanay sa pagpungko sa hagdan apisar nga may yara pa sang bakante nga pulungkuan.
Dugang pa niya, istrikto nga ginapatigayon ang pre-departure inspection sang iya mga personnel.
Gin-athag man niya nga lain ang “overloading” sa “excess capacity.”
Ang overloading suno sa iya amo ang paglapaw sa load line samtang ang excess capacity amo ang pagsobra sa allowable passenger.
Nahibaluan nga sang nagligad nga mga inadlaw, nag-aso ang generator sang amo nga sakayan rason sang pagkinaran-karan kag pagpalanaog sang mga pasahero samtang yara ini sa Parola Wharf kag nagapasaka sang pasahero padulong sa Jordan Wharf.
