Naagaw na sang Pilipinas sa China ang pwesto sa nagapanguna nga rice importer sa bilog nga kalibutan!
Sandig sa report sang United States Department of Agriculture (USDA) nga may titulo “Grain: World Markets and Trade”, gin-project nga ang importasyon sang bugas sa Pilipinas ang magadangat sa 3.8 million metric tons sa marketing year 2023-2024 samtang ang imports naman sang China ang maganubo sa 3.5 million metric tons.
Sa amo man nga report, ginpahayag sang ahensya nga ginapunggan anay sang Pilipinas ang rice importation subong nga tuig bangud sa nagapanglakaak nga presyo sang bugas nga resulta sang rice export ban sang India kag Vietnam.
Kun basehan ang amo gihapon nga report, ang global price sang bugas subong amo na ang pinakamataas sa sulod sang 15 ka tuig kasunod sang pagpatuman sang India sang export ban policy.
Ang India amo ang naga-suplay sang ginabanta 40% sa global rice trade apang gin-ban na sini ang pag-export sang non-basmati white rice sang Hulyo nga amo ang rason sang pagsaka sa presyo kag pagnubo sang suplay.
Ang Thailand kag Vietnam naman ang nagapanguna nga ginakuhaan sang Pilipinas sang imported rice subong nga 2023.
Base sa Septyembre 7 nga data sang Bureau of Plant Industry, ang rice imports ang nakadangat na sa 2.33 million metric tons kun sa diin 4.46 percent ang halin sa Thailand kag 89.85 percent ang halin sa Vietnam.#
See Translation
