Posible nga magabalik na sa Miss Universe Philippines stage ang isa sa mga pinaka-paborito mo nga kandidata sang nagliligad nga edisyon sang pageant!
Ini ang matunog subong nga gina-istoryahan sang pageant fans matapos gin-anunsyo sang Miss Universe Organization nga ginkakas na ang age restrictions sa Miss Universe kag associated pageants kag epektibo na ini umpisa sa 2024.
Sa pito ka dekada nga pagdalagan sang amo nga pageant, ang naga-edad lamang 18-28 anyos ang ginatugutan nga magpasakop, apang bangud sa bag-o nga announcement, mahimo na maka-partisipar mangin ang mga beauty queens edad 29-anyos pasaka!
Diri naman kag naga-asud-asud ang mga pangalan nga gina-mensyonar sang mga Pinoy lakip na ang Negrense beauty queen nga si Vickie Marie Rushton nga subong kasado na kag may anak na kay Jason Abalos; Samantha Bernardo nga first runner-up sa Miss Grand International 2020 pageant; kag si Reina Hispanoamericana 2017 Winwyn Marquez nga may yara naman sang isa ka anak kag pakaisa ni reigning Miss Universe Philippines Michelle Dee.
Madamo man ang naga-hingyo nga sa ikaapat nga tion, magpasakop liwat sa Miss Universe Philippines si Pauline Amelinckx nga amo man ang first runner-up sa Miss Supranational 2023.
Popular man sa pageant fans ang mga standouts halin sa 2021 batch nga sanday Miss Universe Philippines Tourism Katrina Dimaranan kag second runner-up Steffi Aberasturi nga subong kasado naman.
Nahibaluan nga antes ang pagkakas sang age limit, ang Miss Universe Organization ang una na nag-anunsyo nga pahanugutan man sini ang mga iloy kag mga kasado nga babayi nga mag-compete para sa korona umpisa sa 2023 edition nga patigayunon sa El Salvador sa Nobyembre 18. #
