Posible nga malab-ot pa ang Pilipinas sa South America agud lamang nga maka-import sang bugas.
Ini ang ginkonsiderar nga posibilidad kadungan sang meeting nanday Foreign Affairs Secretary Enrique Manalo kag Santiago Andres Cafiero nga minister sang Argentina para sa foreign affairs, international trade and worship, sa Palacio San Martin sa Buenos Aires.
May ginpaguwa nga pahayag nga ginalantaw sang duha ka opisyal ang posibilidad sang rice importation apang wala pa sang gindugang nga detalye.
Yara si Manalo sa Buenos Aires kasunod sang imbitasyon sang minister agud nga dumdumon ang 75th anniversary sang diplomatic relations sa tunga sang Pilipinas kag Argentina.
Nahibaluan nga suno sa Bureau of Plant Industry, ang Thailand kag Vietnam ang nagapanguna nga sources sang imported rice sa Pilipinas subong nga tuig.
2.33 million metric tons na ang na-import nga bugas subong nga tuig nga 4.46 percent halin sa Thailand kag 89.85 percent halin sa Vietnam.#
