Nagpasaka na sang kaso ang National Bureau of Investigation (NBI) batok sa anum ka mga indibidwal nga gin-alegar involved sa smuggling sang bombay sa Pilipinas.
Suno kay Department of Justice (DOJ) Secretary Jesus Crispin Remulla, may mga opisyal sa gobyerno nga kabahin sang ginpasakaan sang kaso nga profiteering kag hoarding.
Suno naman kay DOJ Usec. Geronimo Sy, nag-ugat ang reklamo sa pagbaligya sang private cooperative sang 8,000 bags sang bombay sa government-owned and controlled corporation Food Terminal Inc. sang Disyembre 2022.
Ginpahayag nga natukiban sang NBI nga kada bag ang nagaunod sang at least 25-kilos kag ang presyo kada kilo ang nagalapaw sa P500 apisar nga farmgate price sang bombay sang amo nga tion ang wala gani nagalab-ot sa P20.
Dugang pa ni Sy, ang respondents ang nagapangatubang man sa reklamo nga kaangot sa ginpeke nga mga dokumento nga ginpasa sa bidding process.
Pahayag sini, ang taktika sang mga ginkasuhan amo ang pagpasa sang tatlo ka proposals sa tion sang bidding — duha diri ang himu-himo lang rason nga ang ila gusto nga bidder amo ang magadaog.
Ginpahayag man nga P134-million halin sa Department of Agriculture ang involved sa kaso.
Wala ginhingadlan sang DOJ kun sanday sin-o ang ginkasuhan agud nga malikawan nga maunahan ang mangin evaluation sang prosecutors.
Pahayag naman ni Remulla, isa pa lang ini sa madamo nga kaso nga buot i-file sang NBI kaangot sa hoarding kag smuggling sa bombay.
Ini ang ginatudlo nga rason sang pagpanglakaak sang presyo sang produkto sa merkado sang katapusan sang 2022 nga nagdangat sa lapaw P700 kada kilo.
Sang Hulyo matandaan nga nagpahayag si Remulla nga may ginatun-an nga kaso nga economic sabotage batok sa industry players bangud sa gin-alegar nga onion cartel. Sang amo nga tion, may yara suno sang tiglikom sang anum tubtub pito ka mga indibidwal nga ginalantaw nga kasuhan.#
