Ginalantaw sang Department of Energy (DOE) nga indi magnubo ang presyo sang produktong-petrolyo tubtub matapos ang bulan sang Disyembre subong nga tuig.
Ginpakigbahin ini ni Energy Undersecretary Sharon Garin matapos ang meeting sang mga myembro sang Kamara kaupod sa mga tiglawas halin sa oil industry kahapon, Septyembre 18.
Ang amo nga meeting ang ginpatawag ni House Speaker Martin Romualdez agud magpangita sang ‘win-win solution’ kasunod sang 11 ka semana na nga asud-asud nga semana sang pagsaka sa presyo sang gatong diri sa Pilipinas.
Suno pa kay Garin, kinahanglanon gid nga pahagon-haganon ang epekto sini nga price increase sa katapusan nga quarter sang tuig ukon sa masunod nga tatlo ka bulan.
Suno naman kay ACT-CIS Partylist Representative Erwin Tulfo nga nagtambong man sa amo nga meeting, nagahingyo man ang oil industry representatives sa suspension sang excise tax sa produktong-petrolyo.
Nagapangayo man sila sang polisa nga amo ang magapahanugot sa ila nga magbakal sang mas daku nga amount sang imported nga bio ethanol oil tubtub sa katapusan sang tuig agud nga mas mapanubo ang presyo.
Apang suno kay Tulfo, indi man kumbinsido ang mga mamalidha sa sini lang nga mga tikang bangud dapat nga may yara man sang kontribusyon ang oil industry sa pagnubo sang presyo.
Diri na kag nagpamangkot ang House Speaker kun ano ang ila nga ma-contribute.
Nabudlayan sa pagsabat ang mga tiglawas sa oil sector gani nga may meeting pa nga gin-schedule sa masunod nga semana.
May mga suhestyon nga ginbalay ang mga mamalidha kag amo naman ini ang iplastar sang mga representatives sa ila nga mga boss.
Pananglitan i-suspinde ang excise tax sa produktong petrolyo tubtub sa katapusan sang 2023, tubtub sa P4.5 billion ang mapierde sa gobyerno.
Apang kun ipatuman man ini, buot silingon, mabuhinan sang P10 ang presyo sa kada litro sang produktong petrolyo. Posible man mga magabuhin pa ini sang P4 kun kuhaon man ang requirement nga i-mix ang ethanol sa oil products. #
